PUTA
May 20th, 2007
by J.F. Lacaba
Marumi ang pulitiko pero malinis ang
budhi ng puta.
Ipokrito ang pare pero may ginituang
puso ang puta.
Nagpapa-aral ng kapatid na magpapare
ang puta.
Namumutiktik sa putang ina at anak ng puta
ang malaswang bibig ng puta.
Nalulong sa droga ang anak ng puta.
ayaw ng putang ina na masadlak ang
anak niyang babae sa pagpuputa.
Ang unang tikim sa luto ng Diyos
ay pinatikim ng puta.
Bukas ang simbahan kahit madaling araw
tuwing nagdarasal ang puta.
Nagbubulungan ang mga manang na
nakakasalubong ng puta.
Ginahasa ng tiyuhin ang puta kung kaya
siya nagputa.
Tulak ng kahirapan kaya
nagputa ang puta.
Hindi nagpapahalik sa labi ang puta.
kapwa puta ang mga kabarkada
ng puta.
Magandang lalake ang nag-aalay ng
tapat na pag-ibig sa puta.
Kung binabaril ang bidang lalake
yumayakap at tinatamaan
ang puta.
Tanging kamatayan ang tutubos
at magpapatawad
sa kaputahan ng puta.
Sigaw ng puta!
Pare-pareho naman tayong
Puta!
Uncategorized |
Leave a Reply